Ohin, 15 Novembru 2020, Fundasaun Hadomi Timor realiza Seminariu loron sorin ho topiku Jestaun Hosting & Domain hamutuk ho Orador CEO Kalohan.net Sr. Armindo de Jesus no Partisipantes mai husi Alumni Hadomi Timor, IT SMART ACADEMY, Community Youtuber Timor-Leste – CYTL, Estudante Universitariu sira no publiku.

Iha seminariu ne’e orador esplika kona ba Shared Hosting, VPS Hosting, Dedicated Hosting, Collocated Hosting, Manage Hosting, Reseller Hosting, teknolojia foun hanesan Cloud Hosting ne’e modernu liu fali, lalaok hili no deside Domain, load balance no oinsa asegura dadus husi hacker sira.

Fundasaun Hadomi Timor mos orgulho ho prezensa Prezidente ICT-TL atual, Sr. Ray Soares iha seminariu refere, tamba depois eleitu sai prezidente ICT-TL atividade dahuluk nebe mak prezidente ne’e partisipa mak seminariu Jestaun Hosting & Domain organiza husi Fundasaun Hadomi Timor.

Diretur Nicho Linux kontinua konvida CEO kalohan.net atu marka nafatin tempu hodi sharing ka fahe matenek sira nebe iha ba estudante sira no publiku nune’e bele iha kapasidade naton hodi kontibui ba dezenvolvimentu tekonojia iha rai doben Timor-Leste.

Bravo IT SMART ACADEMY, Bravo Fundasaun Hadomi Timor

Media Hadomi Timor

Loron, 09 Outobro 2020, Fundasaun Hadomi Timor kontinua organiza Seminariu ho tema “Papel Importante TIC iha Era Teknolojia Industria dahat ba Dezenvolvimentu Nasional” ho Orador Prinsipal Diretór Ezekutivu TIC TIMOR.IP, Sr. Roberto Caitano De Sousa Vicente no modera direita husi Diretór Ezekutivu Fundasaun Hadomi Timor Sr Abrao Monteiro – Nicho Linux.

Iha biban ne Diretór Ezekutivu TIC aprezenta ezistensia Ajensia TIC TIMOR I.P tuir Dekretu Lei Númeru 29/2017 ho nia papel atu implementa inisiativa Governu Elektroniku, Diretór TIC mos aprezenta serbisu sira nebé Ajensia ne’e halo durante eziste no planu sira nebé sei halo iha futuru inklui dezafiu sira iha implementasaun programa.

Diretór Ezekutivu TIC mos aproveita biban ida hodi enkoraja joven sira atu kontinua estuda no adapta tuir teknolojia nebe dadauk iha tamba teknolojia agora ne’e mudansa ho tempu nebé lais tebes, nune’e ita tenki esforsu makas atu kompete mos iha era teknolojia industria ida ne’e.

Entertantu Diretur Fundasaun Hadomi Timor esplika katak atividade ida ne’e hanesan atividade reguler Fundasaun Hadomi Timor nian nebé sempre realiza tuir planu estratejia Fundasaun Hadomi Timor nian, atividade ida ne’e mos hanesan programa ida husi literasia dijital atu fo biban ba ema hotu atu konese teknolojia nebe ita adopta ona no kontinua husu partisipasaun ema iha prosesu dezenvolvimentu Teknolojia Dijital iha nasaun Timor-Leste, Atividade ne’e halo iha Kampaun Luta Hamutuk, Farol.

Fontes foto : TIC Timor.IP

Loron sabadu, 30 Marsu 2019, Fundasaun Hadomi Timor organiza mini seminariu hodi fahe esperensia kona ba serbisu IT nian liu-liu area rede komputador iha Instituisaun Governu no Privadu iha salaun Coffee no Books Luta Hamutuk, farol Dili, Timor-Leste.

Fasilitador ba atividade ne’e mak Diretur Sistema Informasaun Timor Telecom – TT, maun Ladislau Saldanha – TAKI no medera direita husi maun Diretur Hadomi Timor Nicho Linux.

Partisipante sira mai husi estudante ativu IT Smart, Alumni, kursu jeral Fundasaun Hadomi Timor nian no publiku.

Loron, Sesta, 22 Fevereiru 2019, Fundasaun Hadomi Timor realiza Seminariu Nasional kona ba Polemika Media Sosial iha salaun DIT durante loron ida, iha seminariu ne’e loke ofisialmente husi Dr. Jose Ramos Horta no orador sira mak hanesan Dr. Abel Pires da Silva, Ekipa Autoridade Nacional de Comunicacao-ANC,Asessor SEKOMS Sra. Titi Ribeiro no Diretor Sistema de Informacao Timor Telecom, Sr. Ladislaun Saldanha-TAKI no modera direitamente husi Diretor Hadomi Timor Sr. Abrao Monteiro-Nicho Linux.

Partisipante ba seminariu ne’e mai husi Sosiedade Sivil sira, Akademiku (Universitariu iha Dili laran no Estudante Sekundaria), reprezentante relijioja, Operador Telekomunikasaun sira, media no instituisaun relevante sira.

Objetivu Husi Seminariu Nasional mak atu konfirma komitmentu nasional ida katak lider sira hotu mos sensitivu natón ba preokupasaun polemika media sosial hosi ita nia povu, nune’e ita sei mobiliza forsa hotu-hotu estadu nian hodi kria kondisaun sosiais ida ne’ebe povu sente seguru. Iha tempu hanesan buka hatoman sidadaun sira atu abitua ho hahalok civiku no demokratiku wainhira atu halo interasaun liu hosi media sosial, nune’e sidadaun sira bele aproveita ho diak liu benifisiu positivu sira ne’ebe oferese hosi media sosias ba interese dezenvolvimento nasional.

Diskursu Diretur Fundasaun Hadomi Timor

• Mak hau respeito, Laureadu Premiu Nobel da PAZ, Nudar mós eis Presidente da Repúblika no eis Primeiru Ministru Repúblika Demokratika de Timor Leste, Sr. Dr. Jose Ramos Horta,  
• Mak hau respeito, Sekretáriu Estadu Komunikasaun Sosiál – SEKOMS, Sr. Mericio Juvinal dos Reis – AKARA
• Mak hau respeito,Prezidente Comissão E Parlamentu Nasional, Sr. Dr. Abel Pires da Silva
• Mak hau respeito, Director Sistema Informasaun Timor Telecom, Sr. Ladislau Saldanha (TAKI)
• Ekipa servisu hosi Autoridade Nasional Cominicação-ANC nian mak hau respeitu

Excelentisimu Senhores  e Senhoras, partisipante sira hotuInterasaun sira ne’ebe existe iha sosiedade nia le’et entre sidadaun sira nudar individu ka nudar grupu importante atu hakiak unidade nasional no hamosu ideias kreativu oi-oin hodi kontribui ba dezenvolvimentu Timor Leste nian, maibe sai diferente wainhira dezenvolvimento hosi teknologia moderna ho nia aproximasaun digitais kria espasu ba interasaun liu hosi media sosiais nudar meus komunikasaun, hanesan Facebook, Whatsapp, Youtube, Twiters, no Instagram.Interasaun sira liu hosi media sosias ikus mai hamosu preokupasaun hosi sosiedade tamba hamosu asaun sira hanesan insultus, tolok, defamasaun inklui publikasaun la ho responsabilidade sira ne’ebe sosiedade Timor leste konsidera la tuir ona valores kulturais nme’ebe importante liu hanesan Valor Respeita Malu no volores direitu no demokratiku Timor Leste nian ne’ebe tane a’as diferensa nudar potensia bo’ot atu hariku hanoin ba dezenvolvimento.Basea ba situasaun hirak ne’e ONG Hadomi Timor hola inisiativa hodi koordena ho entidades relevantes sira hotu, liu husi sorumutuk rona opiniun publiku hosi entidades no grupu oi-oin ne’ebe existe iha sosiedade Timor Leste nian laran hanesan; Joventude, autoridade lokal, ONG, estudante no akademiku sira, konfisoens relijoza, operador telekomunikasaun sira no instituisaun relevante governu nian.Objetivu hosi inisitava ne’e mak atu rona no halibur ideias hosi reprezentante grupu oi-oin relasiona ho polemika media sosias nian hodi kontribui ba esforsu nasional ida hodi buka solusaun nesesaria ne’ebe kontinua konsidera no valoriza liberdade koalia no informasaun nian tuir konstituisaun RDTLDurante sorumutuk rona opinion publiku ne’e, ekipa servisu ONG Hadomi Timor konklui katak, tenke iha duni intervensaun adekuada, integradu no koordinadu hosi autoridade ka instituisaun kompetente hamutuk ho grupu intersada sira ba preokupasaun sosiedade nian kona ba atividade sira iha media sosiasNune’e seminariu loron ohin nian ita sei akompaña hamutuk oradores principal hosi instituisaun relevente sira ne’ebe assume responsabilidade pólitika hodi estabelese, hadia no desenvolve maneira komunikasaun oi-oin ne’ebe seguru ba sidadaun Timor Leste  tomakHein katak seminariu ohin loron nian bele sai hanesan meus atu konfirma komitmentu nasional ida katak ita sei sensitivu natón ba preokupasaun sira hosi ita nia povu, nune’e ita sei mobiliza forsa hotu-hotu estadu nain hodi kria kondisaun sosiais ida ne’ebe povu sente seguru. Iha tempu hanesan buka hatoman sidadaun sira atu abitua ho hahalok civiku no demokratiku wainhira atu halo interasaun liu hosi media sosial, nune’e sidadaun sira bele aproveita ho diak liu benifisiu positivu sira ne’ebe oferese hosi media sosias ba interese dezenvolvimento
Obrigadu!

Loron, Sabadu, 2 Junu 2018, Fundasaun Hadomi Timor realiza mini Seminariu loron ida ho tema “Papel Sposiedade Sivil no Aplikasaun IT SMART” iha salaun cafe and books Luta Hamutuk, farol Dili, Timor-Leste.

Partisipante sira mai husi estudante ativa Hadomi Timor, eskola sekundaria publiku no privadu sira iha Dili laran no alumni Hadomi Timor nian.

Orador ba Seminariu ne’e maun Nicho Linux nudar Diretur Fundasaun Hadomi Timor no maun Jose Alves nudar Diretur Luta Hamutuk.

Komisaun Organizadora ba seminariu ne’e husi ekipa Hadomi Timor nian rasik mak hanesan Eman, Jose Belo, Akai, Aju no Ali.